AWIG AWIG
WARGA BENDESA GERIH
MURDHA CITA
OM SWASTYASTU
OM AWIGNHAM ASTU
NAMO SIDHAM
Antuk panugrahan Ida
Sang Hyang Widhi Wasa,sami Krama Warga Bendesa Gerih sejebag Bali Panegara
Indonesia sampun susatya ngawitin paruman ring Jaba Pura Pusat Kawitan Bendesa
Gerih ,Saniscara Umanis Watugunung, pinanggal
19 Nopember 2011 maka don jaga nyuratan awig-awig.
Maka pengelantur
paruman, paruman juru pangaracana awig-awig, kasanggra antuk utusan pengurus
Kabupaten lan Pemuka Warga Bendesa Gerih sejebag Bali,pinaka ngangganin Krama Warga Bendesa Gerih sejebag
Bali,rikala Saniscara Umanis Watugunung, 19 Nopember 2011 prasida kararemin
kamanggehan awig-awig Krama Warga Bendesa Gerih sane mapusat ring Pradesa
Gerih,maka tepat siku-siku,sekali ring sor puniki:
SARGA I
ARAN KRAMA WARGA
Pawos 1
Krama
Warga puniki, wasta “WARGA BENDESA GERIH
“mapusat ring Desa Gerih,Perbekalan
Abiansemal.Kecamatan Abiansemal,Kabupaten Badung, Propinsi Bali
SARGA II
PATITIS LAN PAMIKUKUH
PALET 1
PATITIS
Pawos
2
Warga Bendesa Gerih ,ngemanggehan
pamikukuh :
1.
Pancasila
2.
UUD 1945
3.
Prasasti Ki Gusti Gede Bendesa ring Pura Pusat
kawitan Bendesa Gerih
4.
Bhisama Warga Bendesa Gerih
5.
Tri Hita Karana manut Tatwaning Bhuwana Agung.
PALET 2
PAMIKUKUH
Pawos 3
Patitis Warga Bendesa Gerih sane mapusat ring Desa Gerih luire :
1.
Mikukuh miwah ngerajegang Agama Hindu
2.
Mikukuh miwah ngerajegan Warga Bendesa Gerih
3.
Mikukuh awig-awig,sima,kerta paswara
4.
Ngrajegang pasukertan krama skala kalawan
niskala
SARGA III
SUKERTA TATA PAKRAMAN
PALET I
INDIK KRAMA
Pawos 4
Sane kasenguh Warga Bendesa Gerih inggih punika ida
dane ,lanang –istri prati sentanan Ida Bhatara Kawitan ,sane nyungsung Pura Kawitan Bendesa Gerih,sane magenah
ring Desa Gerih Perbekalan Abiansemal.Kecamatan Abiansemal,Kabupaten Badung,
Propinsi Bali
Sejaba punika sinanggeh
Tamiu.
PALET 2
KRAMA WARGA BENDESA GERIH
Pawos 5
Krama Warga
Bendesa Gerih wenten luire :
1.
Krama Warga negak linggih (Pengarep)punika warga
sane jangkep lanang istri
2.
Krama Warga sane sampun nenten madue rabi utawi
istri,yening makhyun manggeh ngrama .dados krama lanang yening ten medue
istri.Krama istri yening ten madue rabi.
3.
Krama Penyade utawi Pebangkitan
4.
Krama Pengempel
PALET 3
INDIK PRAJURU
Pawos 6
1).Sane kasengguh Prajuru luwire :
a.
Kelian Warga
b.
Pangliman /Wakil
c.
Penyarikan/Sekretaris
d.
Petengen /Bendahara
e.
Kasinoman /Juru Arah
2).Pewantu-pewantu Prajuru :
a. Saya Banten
b. Saya Peresik
c.
Utusan Warga dari Prajuru Kabupaten/Kelian-Kelian Warga
d.
Sekehe Gong
e. Sekehe Shanti
f.
Pemangku.
3).Kawentenang Prajuru luire :
a.
Prajuru Warga Pusat
b. Parajuru Warga Kabupaten
c.
Prajuru Warga Kecamatan
d. Prajuru Warga Desa
PALET
4
TATA
CARA NGADEGAN PRAJURU
Pawos 7
A.NGADEGANG PRAJURU WARGA
1.Ngadegang Kelian Warga ngaken 5 ( limang) warsa,ngawit saking Paruman
Warga
minakadi :
a.
Ngadegang Kelian Warga Pusat,Penyarikan lan
Petengen
b.
Ngadegang KelianWarga Kabupaten,Penyarikan lan
Petengen
c.
Ngadengang KelianWarga Kecamatan,Penyarikan lan
Petengen
d.
Ngadegang Kelian Warga Desa,Penyarikan lan
Petengen.
2.Kesungkemin Olih angga Paruman Warga :
a.
Ngadegan Prajuru
sesosan miwah pewantu Prajuru
kajumput olih Kelian Warga sane sampun keadegan ring Paruman Warga
b.
Ngadegan Pemangku lan Pinandhita manut Perarem
c.
Saya Banten kaambil saking soang purus
d.
Prajuru lan Pewantu Prajuru kautsahayang mangda
uning ring sastra sulur saha tata cara ring adat,agama, lan rasa
tatimbangan,tan cedangga kadi ceda budi
utawi uger-uger panegara.
3.Lianan
ring ngadegang Prajuru punika ,patut kasungkeman ngadegang Prajuru
Pengempon Pura Kawitan Warga Bendesa
Gerih.Kelian Warga Pengempo inggih punika
Kelian sane keadegan olih Warga Pengempon tur ngelaksanayang
upakara,piodalan lan
wewangunan ring Pura Ida Betara Kawitan, megenah tur mekrama ring Desa Gerih
a. Krama Warga Pengempon ,Warga Bendesa Gerih
sane megenah ring Gerih
b. Krama warga Pengempon, kaenter antuk Prajuru
Warga Pengempon utawi Sekehe
Cenik.
c. Kaadegan Krama Warga Pengempon Lanang lan
Warga Pengempon Istri ,ayahannye
manut
perarem Krama Warga Pangempon.
B.PRAJURU MAPAMIT.
1.Sampun purna bhakti
swadharman Prajuru ngangken 5
warsa.
2.Yening wenten Prajuru
Warga sadurung wates mapamit,kagentosin olih Prajuru lianan.
3.Yening sadurung wates
swadhamanyane..dane seda, kasungkan,ceda angga,ceput,
kagentosin olih
Prajuru lianan.
PALET 5
INDIK LUPUTAN,PAMINDANDA LAN PENGAMPEL
Pawos 8
A.Luput
1.Kelian
Warga
2.Prajuru
seosan,luput pepeson
B.Pamidanda
Krama Warga sane nenten nyarengan
sangkep,parum,makarya,makta pepeson keni pamidanda manut pararem.
C.Pengampel
1.Krama warga sane kaicen ngampel, yening malinggih ring dura
desa,kaicen luput ayah-ayahan lan papeson, nanging kakeninin jinah pengampel
akehnya manut perarem,patut ketawur nuju Saniscara Umanis Watugunung.
2.Krama Warga sane ngampel,keni
ayah-ayahan lan papeson sekadi krama ayah,yening katur piodalan Ageng.
PALET 6
SWADARMANING KRAMA
Pawos 9
A.Pebaktian.
Krama Warga patut ngaturang pebaktian ring Pura Pusat
Kawitan Warga Bendesa Gerih
ritatkala
piodalan Ida Betara Kawitan.Piodalan ring Pura Pusat,inggih punika :
a.Puranaming
Ke Dasa, lan Sanicara Umanis Watugunung Piodalan
ring Pura Kawitan
Warga
Bendesa Gerih sane mapesengan Dalem Bagendra Sari.Piodalan Ring pura Ratu
Hyang Ibu
lan di Pura Taman Bagendra
b.Buda Wage Langkir ,Piodalan ring Ratu Gede
Panti sane mapesengan Dalem Pengilen
Sari.
B.Paturunan
1.Krama Warga
patut keni paturunan ritatkala Piodalan ring Pura Pusat Kawitan Bendesa
Gerih,kamedalang olih krama jangkep utawi krama kawin.Akehnyane
manut putusan
Paruman .
2.Krama Warga
patut keni paturunan ritatkala kawentenang wewangunan ring Pura
Pusat,olih
krama Pengarep .Akehnyane manut perarem.
3.Krama Warga
sane jagi ngaturang punia,mangdane masadok ring Jro Petengen
(Bendahara),yening jagi kasurat. Dados taler kegenahang ring kotak
punia.
C.Papintonan
1.Yening
wenten embas putra alit ring soang purus ,wiadin meras putra alit patut
ngaturang
papintonan ritatkala piodalan ring Pura Pusat.
2.Yening
wenten silih sinunggil krama warga ngalap alaki rabi purusa,patut ngaturang
papintonan ritatkala piodalan ring Pura Pusat
D.NGATURAN AYAH/LAN LEPAS AYAH
1.Makasami
Krama Warga kedadosan ngaturang ayah,luwire :
a.Ngaturang Pashantian,Kidung.
b.Ngaturang Tetabuhan
c.
Ngaturang Wali
Nanging indik prabiya sami katanggung ring
sang ngaturang ayah.Turamaning mangda
ngawentanga pasadok riin ring Prajuru Pusat.
2.Krama
Warga sane sampun mayusa ulung dasa tiban kedadosang lepas ayah,
ayahnyane
kagentosin oleh Krama Warga Panyade ring Jeroan dane.
E.NGIDIH AYAH-AYAHAN
Krama warga
kadadosang ngidih ayah-ayahan,luwire:
1.
Ngayah ring Desa
2.
Ngayah ring Subak
3.
Kecuntakan
4.
Maduwe Upakara
5.
Kundangan ke sios Desa
6.
Sungkan/gering
PALET 7
INDIK PATUHUN / TUWUN MEWARGA
Pawos 10
1.
Yaning wenten sameton pacang tedun
ngeranjing dados Krama Warga Bendesa
Gerih
riantukan
durung naenin ngrama, patut ngawentenang
upakara ngungkah lawang
ping tiga, wawu dados kesahang .Upakarannnye
,luire banten daksina pejati,nunas
wangsuh pada Ida Betara Kawitan. Kesaksinin
olih Prajuru Pusat.
2.
Kapertama Upakara Pemungkah Lawang ,luire :
peras daksina,tipat soda ,canang limang tanding ,segehan cacan kepelan,sesari jinah bolong 50 keteng (Rp.50.000),jinah
menyurat 125 jinah bolong (Rp 125.000)
Kesaksinin olih Prajuru Pusat.
3.
Kaping Kalihne : nyihnayang bhakti terus,upakara
lure : suci asoroh,peras daksina,tipat soda ,canang limang tanding ,segehan
cacan kepelan sesari 30 keteng jinah
bolong (Rp 30.000) .Jinah nyurat ring “Daftar Induk Warga “ katetepang 125
keteng jinah bolong utawi dados kataur Rp.125.000.
Kesaksinin olih Prajuru Pusat.
4.
Kaping Tiga ,ngawit pengesahan ,upakarane manuhun
ping tiga ,luwire : peras daksina suci sibakan,tipat soda,canang limang
tanding,segehan cacan kepelan ,sesari
manut ledang kayun dados,jinqah nyurat taler tetep 125 jinah bolong. Kesaksinin olih
Prajuru Pusat.
5.
Risampune semeton mayadnya ping tiga ,wawu
kaunggahin ring buku rincikan anggota
,lan ngawit tedun mekrama Warga Bendesa
Gerih,Nawur jinah pokok krama akehnia manut perarem,nebus kartu anggota pinaka
syah dados krama Warga .
SARGA IV
SUKERTA TATA AGAMA
PALET 1
INDIK DEWA YADNYA
Pawos 11
Pejantenan wali ring
Pura Kawitan Pusat Warga Bendesa Gerih ,luwire :
1. Puranaming
Ke Dasa, lan Sanicara Umanis Watugunung Piodalan ring Pura Kawitan
Warga
Bendesa Gerih sane mapesengan Dalem Bagendra Sari.Piodalan Ring pura Ratu
Hyang Ibu
lan di Pura Taman Bagendra. Buda Wage
Langkir ,Piodalan ring Ratu Gede
Panti sane mapesengan Dalem Pengilen Sari.
2. Ritatkala Purnama
Tilem Kesanga ,nyungkemin Desa Pekraman.
3. Ritatkala
Galungan,Kuningan,lan Pagerwesi ,tedun ngemargiang Yadnya ring sehanan
gegamelan Pura kawitan Pusat.
4. Nangken rahina
Tumpek Landep, ngaturin piodalan : Pusaka/Pajenengan Ida Batara
Kawitan Bendesa Gerih sekadi : Pusaka
Keris,Tombak ,Batu Lesung, tombak Nawa
Sangha.
5.Ngangken rahina Saniscara Umanis Watugunung piodalan Sang
Haji Saraswati
,ngaturin piodalan : Ring
Prasasti sepisan piodan ring Pura
Kawitan Pusat .
PALET 2
INDIK BHUTA YADNYA
Pawos
12
1.Yaning wenten warga pacang
mecaru ageng,langkungin ring mecaru siap
Panca Sata
,patut nunas tirta ke Pura Pusat
,bantennyane :peras daksina ,suci asoroh,tipat
soda,segehan cacan kepelan, tabuhan tuak
arak, canang limang tanding, sesari 250
jinah bolong Pengayate ring Ida Bhatara
Kawitan Ki Gusti Gde Bendesa Gerih .
2.Yaning mecaru antuk
ayam lelima, aukud ,dados muput saking sanggah piyasan.
Bantennyane : tipat soda, canang
rangkep,sesari limang keteng,segehan cacan kepelan,
tabuhan tuak arak,pengayate ring Ida
Bhatara kawitan,Ratu Dalem Pangilen Sari.
PALET 3
INDIK MANUSA YADNYA
Pawos
13
A. Metelu
Bulanan
Metelu bulanan, rawuhing mesangih,
masakapan dina asiki ,utama ,upakara penunasan tirtha : daksina asoroh,tipat
soda,suci asoroh sibakan,caaaaaaanang limang tanding,segehan cacan kepelan
sesari 250 jinah bolong,sane katur 125 jinah bolong.
B. UPAKARA
PESAKAPAN
1.Yening Ida Dane
Krama Warga ngawentenang upakara Pesakapan patut nunas
tirtha Ida Bethara Kawitan. Upakarannye ;
peras daksina asoroh,tipat soda, suci
asoroh,canang limang tanding, segehan cacan
kepelan,sesari 250 jinah
bolong,saane katur 125 jinah bolong.
2. Yening mesangih
pateh sekadi upakara mesakapan.
3. Upakara
nyambutin alit muang ngotonin : Upakarannya ,tipat soda,canang rangkep
segehan cacan kepelan, mesari 5 keteng jinah bolong ,tabuhan tuak
arak,dados
nyawang sakeng Piyasan ring Mrajan.Pengayate
ring Ida Bhatara Kawitan,melingga
ring Pura Dalem Pangilen Sari .
PALET 4
INDIK PITRA YADNYA
Pawos
14
1.
Pelebon Utama.
Yening ngawentenang pelebon utama
patut nuhur tirta Ida Bhatara Kawitan,upakarannya ;suci genep,daksina
gedeasoroh,karangan asoroh,salaran lebeng
matah asoroh,tegen-tegenan,panyugjug bebek siap hidup,segehan cacan kepelan,sesari 160.000 jinah keteng.sane katur 125 jinah
keteng.
2. Pelebon
Madya
Yening ngawentenang pelebon madya
patut nuhur tirta Ida Bhatara Kawitan,upakarannyane suci asoroh,peras daksina
,tipat soda,salaran lebeng matah asoroh ,panyugjug bebek siap hidup,segehan
cacan kepelan,sesari 100.000 jinah keteng,sane katur wantah 125 jinah keteng.
3. Pelebon
Nista
Yening ngawentenang pelebon nista patut nhur
tirta Ida Bhatara Kawitan,upakara :peras daksina ,suci sibakan asoroh ,tipat soda, segehan cacan
kepelan, canang sari limang tanding,sesari 500 jinah bolong ,sane katur 125
jinah bolong.
4. Saluirin
pekaryan Pitra Yadnya,sapatutnyane ngangge tirta pangentas saking Sang Pamuput,
sekadi Pinandhita,Daksa,mekadi warga ngangge tirta Ida Pinandhita.
5. Saluirin
Palebon ,Nista, Madya,Utama,patut nunas tirta Tunggang sane magenah ring Gunung
Lempuyang .Tirta Tunggang sampun pra sedia ring Pura Pusat.
PALET 5
INDIK SESANANING WARGA BENDESA GERIH
Pawos 15
1. Yening
wentan Warga sane sampun madiksa /Sulinggih/Pinandhita,kelabubangan kadadosan
ngangge Padmasana ,Patulangan Lembu Putih.
2. Mekadi
Warga sane sampun mawinten utama,pawintenan madya,dados ngangge bade
tumpang siya,sanglad bomo,uncal kapas,
saluiring kapas dados ngangge patulangan lembu selem,dados memanah toya miwah
naga banda.
3. Mekadi
warga sane kantun welaka kadadosang,ngangge bade tumpang pitu tur dados ngangge
patulangan lembu selem,sarwaning sato wenang,memanah toyo miwah sane toyosan
wenang.
4. Yaning
pengambile alit,se alit-aliting pelebuan wenang, sesanan dane taler kadadosan
manut Nista.Madya ,Utama.
PALET 6
INDIK KAJANG PENGANGGEN WARGA BENDESA
GERIH
Pawos 16
Warga Bendesa Gerih
yening kelayu sekaran patut lan wajib nganggen Kajang Penganggen Bendesa Gerih,yening
sampun nganggen kajang Ida Bhtara Kawitan
sampun kawastanin sempurna kesidaning don.
1.Indik Kajang Pengganggen Warga Bendesa
Gerih ,sane keangge,ngangge aksara
enembelas siki . Kekaryaning
antuk dane Penglingsir ,miwah jro Mangku Kawitan sane
pelaspas. Pinunas kajang kawitan mangde kasurat
ring Buku Pinunasan Kajang.
2.Upakara penunasan
Kajang Kawitan Warga Bendesa Gerih
.Upakarannyane :daksina
gede asoroh,sesari
sepesatus jinah bolong leleb wantah satus selai jinah bolong ( Ring
Penglisir Penyurat
Kajang ).
Pemelaspas kajang :
peras daksina,suci asoroh,tipat soda,karangan,segehan cacan
kepelan,sesari
limang atus ,sane katur satus selai
jinah bolong kelelb antuk Jro Mangku
sane
melaspas kajang . Sesari sane
siosan katur ring Prajuru Kawitan. Kajang Kawitan
kapelaspas
ring Pura Ratu Hyang Ibu
3.Piranti sane patut
kebakta ritatkala Warga Bendesa Gerih
nunas Kajang ring Pura
Kawitan Pusat Warga
Bendesa Gerih,luwire :
a.
Kasa putih 4 meter ( yening merupa sawa ),3
meter yening nenten merupa sawa.
b.
Eteh-eteh pengentas luwire :
Jun Pere,kertas ulantaga.
c.
Jinah bolong akehnyane 66 keteng.
d.
Peras Daksina penulis Kajang Kawitan (Penulis
Kajang Pengelingsir Warga Pengempon)
e.
Piranti ring ajeng wantah angge olih sawa asiki
.
4.Banten ritatkala
Melaspas Kajang olih Jro Mangku Kawitan Pusat,luwire:
Daksina
gede,suci asoroh,tumpeng pitu(7) asoroh,prayascita durmanggala
asoroh,penyambutan asoroh,canang pemendak,segehan ,peras daksina asoroh.
5.Nunas
Tirta Ngaben ( ring Pura Kawitan Pusat Warga Bendesa Gerih )
Upakarannye : Daksina gede asoroh,suci asoroh,salaran bebek,siap (hidup)
6.Nunas Tirta Nyekah ( ring Pura
Kawitan Pusat Warga Bendesa Gerih )
Prasdaksina asoroh,suci asoroh.
7.Nunas Tirta Ngaben lan Nyekah ring Pura
Kawitan Pusat Ratu Hyang Ibu lan Pura Ratu
Gede
Panti ( Pura Dalem Pangilen Sari )
Prasdaksina asoroh ,suci asoroh ( Ratu Hyang
Ibu ).Prasdaksina asoroh,suci asoroh (Ratu
Gede
Panti ).
PALET
7
INDIK
CUNTAKA
Pawos 17
Yening wenten silih sinunggil krama warga sane
seda,kahitung saking pengutangan,yening mebasmi kulawarga ngarep kekeniang
cuntaka 3 (tigang) rahina.Yening sawa punika mependem ring setra,kekeniang
cuntaka 7 (pitung) rahina.Yening wenten anak alit seda ngatut pungsed kekeniang
cuntaka 21 (selikur ) rahina. Cuntaka punika dados taler nganutin desa kala
patra genah semeton warga.
SARGA V
INDIK PAMITEGES PIODALAN
PIODALAN RING PURA KAWITAN PUSAT
WARGA BENDESA GERIH
Pawos 16
1.Mungwing
piodalan sane kelaksanayang ring Pura Kawitan Pusat Warga Bendesa Gerih
Kategesin ring
rahina Purnaming sasih Kedasa,piodalan
nadi ,mebebangkit .Piodalan
ring Ratu Hyang Ibu lan Pura Taman Bagendra
katurin Pulagembal .Piodalan nyejer
3(tigang) rahina
.
2. Pioalan Prasasti
ring Ida Bhatara Kawitan,ketegesin ring rahina Saniscara Umanis
Wuku Watugunung / Piodalan Sang haji Sarawati .Piodalan
katur ring Ida Bhatara
Kawitan
mepereman.Nanging yening piodalan
punika rauh nemonin rahina Purnama
lan Tilem,piodalan
jagi katur :mebebangkit, nyejer 3 (tigang ) rahina.
3.Piodalan ring
Pura Ratu Gede Panti sane
mapesengan Pura Dalem Pangilen Sari
Kategesin ring
rahina Budha Wage Wuku Langkir,Piodalan katur Ring Ida Sang Hyang
Maha Pita
Pangilen Sari: Mepereman.Yening piodalan punika rauh nemonin rahina
Purnama lan
Tilem patut nadiang,upakaranyane “mebebangkit “ .Piodalan nyejer 3
(tigang) rahina.
4.Saluwiring
piodalan,krama lan kulawarga Warga Bendesa Gerih patut ngerawuhin tur
ngaturang pemijian.Patut masedana, rauh ring Jaba Pura,patut nyuciang
angga ring genah toya pabersihan sane magenah ring gebeh apit surang, kasiratin
ping tiga toya pabiuhkawon,ping tiga tirta panglukan.
5.Krama
pemedek ritatkala Piodalan Kedasa ,riantukakkan piodalan Ida Bhatara
sinarengan; mangdane pinih riyin rauh tangkil ring Pura
Ratu Taman Bagendra ,ngaturang pemijian tur sembah bhakti ring Ida Bhatra Ratu
Taman Bagendra .Ri sampun puput polah palihin pebhaktian ring Ratu Taman,raris
lunga ngaturang sembah bhakti lan pemijian ring Pura Ratu Hyang Ibu.Riwus
ngaturan maijian lan sembah bhakti ring Ratu Hyang Ibu ,wawu ngeranjing
ngaturang sembah bhkati lan pemijian ring Ida Bhatara Kawitan sane mapesengan
Ida Ratu I Gusti Gde Bendesa.
6.
Malih yening wenten krama warga jagi nunas pengelukatan,papintonan,mapekeling,
tur nunas wangsuh padhaan Ida Bhatara Kawitan sepatutnyane sadurung ngaturang bhakti,melukat ring Ratu Hyang Ibu.
7.Piteket.Saluwiring ngewangun Panca Yadnya ,krama Warga Bendesa
Gerih sejebag Bali,patut ngewangun Sanggah Pemaniu .Katanjebin ring kiwa Kori Pemesuan soang-soang.Unggahan
upakarannia : soda putih kuning,bayuhan dasa tangding,katik tebu tabuhan tuak
arak.Pengayate katur ring panjak Bhatara Kawitan saking Pralina, sane
mapesengan Panjak Dalem Cungkub Manik ( Kiai Jagul ).
SARGA
VI
INDIK
URUNAN LAN SESARI
PALET
1
INDIK
URUNAN
Pawos 17
Krama Warga Bendesa Gerih keni
urunan sekadi ring sor :
1.Urunan wengunan manut ring perarem.
2. Urunan Dewa
Yadnya,Bhuta Yadnya, Pitra Yadnya ,akehnyane manut perarem.
3. Urunan kempakan
/ kematian Dane Jro Mangku Kawitan Pusat ,manut perarem.
4. Urunan
kempakan / kematian Prajuru Pusat ,manut perarem.
PALET 2
PAH PAHAN SESARI
Pawos 18
Sesari pemijian
sane katur olih krama warga kepah dados 4 (papat) .
Sadurung
kepah,sesari punika keangge nahur prabiya : PAM.Listrik,Pebersiahan,ayahan
khusus.Wawu kepah dados papat sekadi ring sor puniki :
1.Ke Kas Umum Prajuru pusat.
2.Prajuru Pusat Warga
Bendesa Gerih lan JuruTukang Banten
3.Jro Mangku Kawitan
lan Juru Sutri
4.Warga Pengempon Lanang
( Sekehe Cenik ) lan Warga Pengempon Istri .
SARGA VII
PELABA PURA KAWITAN PUSAT WARGA BENDESA
GERIH
Pawos 19
Pelaba deruwen Pura
Kawitan Pusat Warga Bendesa Gerih,luwire :
1.
Merupa tanah penegalan ,sane magenah ring Subak
Abian Belumbungan ,Sibangkaja,Abiansemal ,Kabupaten Badung .Jimbarnyane
………are,sampun mesertipikat .
2.
Merupa tanah sawah,sane megenah ring Subak
Penarungan,Kecamatan Mengwi,Kabupaten Badung. Jimbarnyane ………are ,sertifikat
kantun ring proses.
SARGA VIII
NGUWAH NGUWUHIN AWIG-AWIG
Pawos 20
Nguwah nguwuhin awig-awig ,kengin
kemargiang yening wenten pakarsan Prajuru, wiadin
warga pinih kedik apah tigang gebogan krama
Warga Bendesa Gerih .
1.Polahe inucap ring ajeng, mangda
kemargiang sejeroning paruman warga antuk gilik
seguluk.
2.Nguwah nguwuhi inucap,mangda kawikanin antuk Prajuru Pusat
Warga Bendesa
Gerih,miwah manggala mapikukuh,tur kesiarin maring Warga sami.
SARGA
IX
PAMUPUT
Pawos 21
1.Awig-awig puniki
keraremin olih Krama Warga Bendesa Gerih duk Rahina Saniscara
Umanis Watugunung,Piodalan Sang Hyang Aji
Saraswati ,pinangal 19 Nopember
2.Awig-awig puniki
kamargiang ngawit kasobiahang
3.Sekeluwirng sane
dereng masurat iriki,kantun kantun kamanggehang manut polahe sane
sampun ketah memargi ,kadulurin antuk
pararem.
4.Awig-awig puniki
kalingga tanginin olih Prajuru Pusat Warga Bendesa Gerih.
Kelian Pangliman
:
Drs. I Ketut Sinartha,M.Sc 1.
I Nyoman Biakta
2. I Made Suwitra
3. I Wayan Pasek
Petengen Penyarikan
I Ketut Sudiarta,SE
Ir.I Nyoman Betha Aryawan,MBA
DAFTAR KEPUSTAKAAN
1.Babad Warga
Bendesa Gerih
2.Prasasti Ki
Gusti Gde Bendesa Gerih
3.Materi Paruman
dari Tahuh Ke Tahun Warga Bendesa Gerih
4.Purana Warga
Bendesa Gerih
5.Buku Penuntun
Kajang ki Bendesa Gerih
